राजनीतिक परंपराक भूमंडलीकरण

राजनीतिक परंपराक भूमंडलीकरण

सुनैत छी, अमेरिकाक उपराष्ट्रपति कमला हैरिस सेहो

जीविकाक लेल बेलने रहथि पापड़ 

आ छनने रहथि आलू, 

मैकडोनाल्डक भनसाघरमे !

मुदा, आलू छानि, आ बेचिकए चाह

जँ केओ भए सकैत अछि उपराष्ट्रपति

वा प्रधानमंत्री

तँ पूर्व राष्ट्रपतिओ एही नुस्खासँ

 पुनः जीति सकैत छथि चुनाओ !

एही गुरकेँ मानि गुरुमंत्र

भाई ट्रम्प एहि बेर शुभ मुहूर्तमे 

मैकडोनाल्डक भनसाघरमे पूरा केलनि

 आलू छनबाक अभियान!

ततबे नहि,

सुनैत छी, ट्रम्पक एवजमे बैसल छल,

मैट्रिक/ ‘सैट’ परीक्षामे

 केओ फर्जी विद्यार्थीओ.

ऊपरसँ ट्रम्पक छनि माथ पर कुल

चौंतीसे टा अपराधक केस-

बलात्कार, हत्या, आर्थिक अपराध आ देशद्रोह,

किछुओ नहि शेष !

तथापि, थिकाह भूतपूर्व राष्ट्रपति

आ छथिए पुनः एहि बेर चुनावमे ठाढ़!

माने, वएह सबटा योग्यता आ गुण

छैक अमेरिकहुमे भेल जा रहल छैक अपरिहार्य,

जे जितबाक हेतु चुनाव

छैक भारतमे मोटा-मोटी

आवश्यक-अनिवार्य! 

भेलैक ने ई असली

राजनीतिक परंपराक भूमंडलीकरण !

रावण-दहन

 

रावण-दहन

मैदानमे ठाढ़,

जरबा लेल तैयार,

रावणक ठोर पर पसरि गेलनि मुसुकी,

देखिते ठाढ़ मंच पर

मुँहपुरुखक समूह.

मने कहैत होथि ओ:

भाइलोकनि,

सत्ते, थिक ई बड्ड सनगर खेल !

पुनः क्षणहिमे जेना

ठहाका दए हँसय लगलाह रावण.

थम्हलनि ठहाका

तँ, गजय लगलाह मनहि-मन,

देलनि मोँछ पर ताओ,

दैत एकत्र समूहकेँ  चुनौती,

भाईलोकनि, करह जतेक होअह ब्योंत,

जरबह नहि हम किन्नहु,

हेबो करत नहि ताधरि हमर वध,

ने हएत हमर दिन बाम

जाधरि तोहरा लोकनिक ह्रदयक कोनमे

नुकायल रहबह हम

आ दुबकल पड़ल रहताह राम !