Sunday, October 13, 2019

मिथिलांचल शिक्षा व्यवस्था ध्वस्त अछि


अवाम 2019: एकटा कोलाज
अवाम, दुर्गापूजा 2019: ऋचा-पाठ
प्रतिवर्ष दुर्गापूजामें अपन गाम अवाम यात्रामें स्थानीय ग्रामीण सबहक आँखिक जांच आ चिकित्सा हमर एकटा प्रमुख उद्देश्य रहैत अछि. पछिला वर्ष एहि अभियानमें पिंडारूछ सेहो गेल रही. एहि बेरुका बाढ़ि सडक यातायातकें बहुतो ठाम बाधित केने छैक, तें गामहिं छी. आइ भोरमें हमर ग्रामीण, आ महादेव पूरन टिबरेवाल हाई स्कूल, झंझारपुरमें हमरा सं दू वर्ष आगूक तहियाक छात्र आ आजुक सेनियर सिटिज़न श्री मायानन्द झा हमरा ओतय आँखि देखबय आयल छथि. हम पुछ्लियनि, ‘गामक की हाल ?
‘हालत ई जे..’ हमर कुर्ता-पायजामा पोशाककें लक्ष्य करैत कहलनि, ‘..... गाम में जं एखन दसो बीघा जमीनक मालिक छी, तं, एहन कुर्ता-पायजामा नहिं पहिरि सकैत छी !’
‘ कारण ?’
‘सरकारी नीति. एखन गाममें खेतिहर मजदूरक दिन भरिक न्यूनतम मजदूरी छैक 275/ 300 टाका. माने सरकारी दर पर एतबा टाकामें 75 किलो चाउर-गहूम भेटैत छैक. तें, एक तं एतय खेतमें जन देबाले लोक नहिं छैक, आ जे अछि तकरा काज करबाक बाध्यता नहिं छैक. सब बाहर चल गेल अछि.’
खेती पर आयल पराभवक हुनकर ई निदान आ तार्किकता असंगत. किन्तु, खेती पर पराभव छैक, ताहि पर केंद्र सरकारकें छोडि, एतय सब सहमत अछि. एहि बेरुका बाढ़िमें तं धानक लागल बीया सेहो डूबि गेलैक. बाढ़ि घटला धरि जं किछु बीया बंचलो रहैक, तं, बड महग. ताहिपर आन गामसं बीया गाड़ी पर लादि कय आनू. ताहूमें एहि गाम सोनाक टुकड़ा ‘सोनम चौरी’ एहि बाढ़िमें चौर में परिवर्तित भ गेले. नवका बड़ी लाइन पानि कें बहय नहिं देलकैक.
अवाम 2019: सोनाक टुकड़ा धानक खेतकें कमलाक बाढ़ि  जलकर बना देलक
किन्तु, गाम परस्थितिपर सरकारी हस्तक्षेपक सकारात्मक परिणाम सेहो भेलैये:
स्व. बौकू कामति हमरा लोकनिक दरभंगा मेडिकल कालेजक दिनक सेवक छलाह: हॉस्टलक गार्ड. हुनकर पत्नी पोखरभिड़ा बाली हमरा सबहक भेंट करय आयल छथि. पुछलियनि, ‘ राशन भेटैत अछि ?’
‘ हँ’
‘आ बृद्धावस्था पेंशन ?’
‘सेहो भेटैए. तीन मासपर मिस-कॉल अबैत छैक. बैंक सं टाका ल अबैत छी.’
‘केओ टाका सेहो मंगितो अछि ?’ ‘नहिं. ’ बाढ़िक सहायता में सेहो सोझे सबहक खातामें छौ-छौ हज़ार टाका एलैये. एकटा गौआं कहलनि, ‘एहि गाम में करीब 297 गोटे बैंक खातामें इंदिरा आवास योजनाक टाका एलैये.’ से आनो कहलनि. लोक सब कें गैसक कनेक्सन आ गैस चूल्हा सेहो भेटलैए. गाम में दू टा गैस एजेंसी सेहो खूजल अछि आ गैस भेटितो छैक. ई क्रांति थिकैक. डिजिटल बैंकिंग बिचौलियाकें दूध महक मांछी-जकां निकालि फेकलक अछि. सरकारी प्रयास सं गौआंके सरकारी योजनाक लाभ सोझे भेटि रहल छैक, से सब मानैये. किन्तु, किछु भ्रष्ट आचरण एखनो छैक. एकटा ग्रामीण कहलनि, ‘राशनक चाउर-गहूम पर डीलर एक रूपया प्रति किलो उपरसं लैत छैक आ पंद्रह किलो अन्नमें एक किलो अन्न काटि लैत छैक. मुदा, चाउर-गहूम उत्तम रहैत छैक.’ ई बड़का परिवर्तन थिक. केवल स्वास्थ्य-सेवाक दृष्टिऍ गाओं बेलल्ला अछि.
*                                   *                                   *
गाओंमें सार्वजनिक शिक्षा ध्वस्त अछि. नाम: स्वेता कुमारी, वर्ग 10. एम पी टी हाई स्कूल, झंझारपुर में पढ़इत छथि. पढ़बा काल आँखि दुखाइत छनि. एम पी टी हाई स्कूल, झंझारपुरक नाम सुनि हमरा एकाएक एहि कन्यासं जुड़ावक अनुभव भेल; हमहूँ ओत्तहि मैट्रिक  धरि  पढ़ने छी.
‘हेडमास्टर के छथि ?’
‘चुप्प !’
आँखि जंचयबाले  प्रतीक्षामें बैसलि पितामही गप्प कें उपरे लोकि लेलनि.’ की कहत ! स्कूल जाइ छै ? नहिं पढ़इए.’ हमरा गप्प बुझबामें आबि गेल ; ई कन्या स्कूलमें नाम लिखौने मात्र छथि. पछाति एकटा हाई स्कूल-टीचर सं गप्प भेल . कहलनि, ‘ नवम आ दशम वर्गमें कन्या सबकें प्रतिवर्ष 1800 रुपैया स्कॉलरशिप भेटैत छैक. साल में नैपकिन अलाउंसक 300 सौ रुपैया सेहो भेटैत छैक. ताहि ले सब केओ स्कूल में नाम लिखौने अछि. स्कूल केओ नहिं जाइत छैक.
‘तखन तं शिक्षाक बड हानि होइत छैक ?’
‘हं. किन्तु, सरकारी स्कूल कें तकर कोन परबाहि. केवल सरकारी अनुदान पर आश्रित स्कूल सबमें विद्यार्थी अबैत छैक आ पढ़ाईओ होइत छैक. कारण, ओहि सब स्कूलसं जतबे विद्यार्थी दसवांमें उत्तीर्ण होइत छैक, ओतबे कें नवां वर्गक वृत्ति सेहो भेटैत छैक.’
‘आ विद्यार्थीक हेतु उपस्थितिक न्यूनतम प्रतिशतक बाध्यता नहिं छैक ?’
‘ताहि हेतु ब्लॉक एजुकेशन ऑफिसर प्रति विद्यार्थी स्कूल सबसं बिनु 10 टाका असूलने उपस्थितिकें सत्यापित नहिं करैत छथिन !’  - एकटा हाइस्कूल टीचर कहलनि।
अर्थात् सक्षम गार्डियन अपन नेना कें प्राइवेट स्कूल में पढ़बैत छथिन, आ सरकारी स्कूलक होसगर विद्यार्थी ट्यूशन पढ़ि परीक्षाक तैयारी करैत छथि. ई अन्याय थिक ! नहिं जानि, समाज कें की भ गेलैये ! लगैत अछि, धन्य पहिलुका समय, नहिं तं हमरा लोकनि तं मूर्खे रहि गेल रहितहु.
*                                   *                                   *
प्रवेश: राकेश कुमार झा वर्ग: बी ए , एक्स वाई जी कालेज, भैरवस्थान (मधुबनी). ई सम्बन्धमें हमर भातिज थिकाह.
‘की सब पढ़इत छी ? इतिहास आ सोशियोलॉजी.’
‘रोज कालेज साईकिल सं जाइत छी ? बड्ड दूर छै. ’
विद्यार्थी गुम्म भ जाइत छथि. कनेक रहि कय कहैत छथि ‘हप्तामें एक दू दिन जाइत छी .’
 आ पढ़ाई ?
‘नहिं होइ छै.  ....... केवल एक-दू टा विद्यार्थी अबै छै.’
‘तखन जनता कालेज, झंझारपुरमें किएक ने नाम लिखाओल ? ओ तं बड्ड पुरान छैक.’
‘ओतहु पढ़ाई नहिं होइत छैक !’
हम क्षुब्ध छी ! हमरा वैज्ञानिक-साहित्यकार योगेन्द्र पाठक वियोगीजी उक्ति  मन पडि अबैत अछि; सोचैत छी,  मिथिलांचलक शिक्षा ‘बिनु जडिक गाछ’ थिक ! किन्तु, समाजक की हेतैक !
*                                   *                                   *
हमर पड़ोसक दू गोट होसगर छात्रक हम गौआं ‘बाबा’ छियनि. ई दुनू बालक झंझारपुर में एकटा प्राइवेट स्कूल में पढ़इत छथि. एहिबेर सनेस में हिनका लोकनिले हम वैज्ञानिक-साहित्यकार योगेन्द्र पाठक वियोगीजीक पोथी ‘ विज्ञानक बतकही’ क दुनू खण्ड अनने छियनि. किन्तु, अंग्रेजी माध्यम स्कूलमें पढ़निहार ई बालक लोकनि ने एकरा सरि भ कय पढ़ि सकताह आ ने विषयकें बूझि सकताह, ताहि पर तं हमर ध्यानो नहिं गेल छल. लगैत अछि, मिथिलांचल में आब मातृभाषामें शिक्षा असम्भव छैक. तें, एतहु बिनु जडिक गाछ; मैथिलीमें घुन लगैत प्रतीत भेल. जं, सरकार मैथिलीमें प्राथमिक शिक्षा आरम्भो केलक तं गार्डियन लोकनि अंग्रेजी माध्यम छोडि अपन-अपन छात्रकें मैथिली माध्यम में पढ़य देथिन, कि नहिं, से बड़का प्रश्न थिक !
*                                   *                                   *
किन्तु, सुनबामें आयल गाम सब में किछु आओर नव-नव परिवर्तन भेलैये. एहि में दू टा प्रमुख: एक, तं मरल माल-जालकें उठओनिहार आब केओ नहिं आ ने मरल पशुकें कतहु फेकबाक स्थान बंचल छैक. तें, अपन मरल माल कें अपने उठबाउ  आ अपने खेतमें खाधि खुनि ओकरा गाडू. दोसर, गाय पोसब तं पोसू. किन्तु, बाछा भेल तं तकर कोनो मोल नहिं ! हम एक गोटेकें पुछलियनि, ‘ तखन बच्छा ल क की करब ?’
‘बुद्धि-बधिया करू !’हुनक उत्तर छलनि. हम निरुत्तर छी.
एकर अर्थ अहाँ स्वयं निकालू. हमरा मारि खेबाक अछि !
____________________________________________
आभार : वैज्ञानिक-साहित्यकार योगेन्द्र पाठक वियोगीजी, 'बिनु जडिक गाछ'  उक्तिक प्रयोगक  हेतु 

                  

निनानबेक पूर वयसमें ‘ शब्द-संधान’ लिखबाक योजना करैत गोविन्द झा


निनानबेक पूर वयसमें ‘ शब्द-संधान’ लिखबाक योजना करैत गोविन्द झा 
(पटना,10.10.2019, श्री गोविन्द झा सं गप्प-सप्प)
आइ गोविन्द बाबू 100म वर्षमें प्रवेश कयलनि, से सुनल. पटना में रही. गोविन्द बाबूक सुपुत्र आ मैथिलीक सुपरिचित साहित्यकार अक्कू जी सं गप्प भेल. कहलनि,  ‘आउ’. श्री गोविन्द बाबू सं सेहो गप्प भेल.  विगत बारह वर्ष सं पटना जाइत-अबैत गोविन्द बाबूसं भेंट करैत छियनि. करीब चारि बजे अपराह्न गोविन्द बाबूक डेरा जाइत छी. अक्कू जी सोझे गोविन्द बाबूक कोठली में ल गेलाह. सामने साहित्यकार रमानंद झा ‘रमण’ जी बैसल रहथि. लगमें अक्कू जीक दौहित्र- शौर्य खेलओनाक साईकिल पर चक्कर लगा रहल छथि. 
गोविन्द झाक संग लेखक ( साभार: रमानन्द झा 'रमण' )
पछिला बेर गोविन्द बाबू सं भेंट भेल छल तं ओ ओहि सं किछुए दिन पूर्व  ओ आइ सी यू सं बहराकय डेरा आयल रहथि. सुनबा में कष्ट रहनि आ शरीर तं अस्वस्थ छलनिए. एहि बेर गोविन्द बाबू स्वस्थ छथि. हाले में आँखिक ऑपरेशन भेल छनि. चेहरापर मुसुकी छलनि. शरीरसं स्वस्थ प्रतीत भेलाह. हम कहलियनि, ‘ अपने एहि बेर प्रसन्न छी आ स्वस्थ लगैत छी.’ गोविन्द बाबू  मुसुकाइत छथि. हम कहलियनि, ‘ऑपरेशन करा लेल, नीक कयल. हम तं कतेक वर्ष सं ऑपरेशन करा लेबाक हेतु कहैत रही.’                                                        
गोविन्द बाबू कोठलीमें सामनेक  देबालकें देखबैत कहैत छथि, ‘ओतय धरि देखैत छियैक. लगमें एखन साफ़ नहिं.’ हम हुनका बुझबैत छियनि, ‘आंखिमें लेंस लगओलाक पछाति दूर देखबाले चश्मा भले आवश्यक नहिं हो, किन्तु, पढ़बाक हेतु चश्मा लगबहिं पडत; डाक्टर नंबर देताह . तखन पढ़ियो सकब. आब दोसरो आंखिक ऑपरेशन करा लेल जाओ. अपने ’पश्येत् वर्ष शरद् शतम्’ कें चरितार्थ कयल.’ अक्कू जी हमर समर्थन करैत छथि. ‘आंखिक ऑपरेशनक बाद बहुत अंतर आयल छनि. आंखिक रोशनीक कारण डिप्रेशन में चल गेल रहथि.’                 
हमरा अपना एहन वृद्ध लोकनिक आंखिक ऑपरेशन करबाक दीर्घकालीन अनुभव अछि. हम कहलियनि, ‘जीवनक अवधि पर दृष्टिक बड़का प्रभाव होइछ , से शास्त्र सम्मत अछि. हम तं लद्दाख़में एकटा वयोबृद्धक दुनू आंखिक ऑपरेशन एके बैसाड में क देने रहियनि. ’ गोविन्द बाबू चुपचाप हमर सलाह सुनैत छथि.
रमणजी हमरा सं पहिनहिं आयल रहथि. ओ गोविन्द बाबूसं आज्ञा ल कय जाइत छथि. आइ श्री गोविन्द बाबूक जन्म दिन थिकनि. गोविन्द बाबू अपनहिं मधुरक डिब्बा खोलि एकटा बर्फी मुँहमें लैत स्वादि कय खाइत छथि. कहैत छथि, ‘ नीक तं लगैत अछि, किन्तु, अहू में मनाही छैक.’
हम कहलियनि, अपनेक स्वस्थ आ प्रसन्न देखि बहुत हर्ष होइत अछि.’ कहलनि, ‘स्वस्थ छी, किन्तु, स्मरण ठीक नहिं. तथापि, भूत सबटा स्पष्ट देखबामें अबैछ. भविष्य अन्धकार लगइए.’ हम एकर अर्थ पूछि हुनका मस्तिष्कपर आओर जोर नहिं देबय चाहैत छियनि. गोविन्द बाबू आगू कहैत छथि, ‘बहुतो गप्प मन पड़ैत अछि. मुदा, लिखबा काल नाम सब स्मरण नहिं अबैत अछि. लिखय बैसैत छी, तं, परिचितों व्यक्तिक नाम मन नहिं पड़ैत अछि. बहुत कालक पछाति कोनो-कोनो नाम मन पड़त.लिखैत-लिखैत बीचो में विस्मरण होबय लगैछ. लिखलो नहिं होइछ. कतेक रास वस्तु लिखबाक विचार होइछ, किन्तु, भ नहिं पबैछ.’ हमरा आश्चर्य होइत अछि, आ प्रेरितो होइत छी. एखनो हुनकर एक कातमें एकटा पेपर क्लिप में थोड़ेक फुलस्केप सादा कागज आ तकर पहिल पेज पर करीब आधा पेजपर किछु लिखल राखल छनि. हिनकर सुन्दर लिपि देखबा जोग होइछ. हम सोचैत छी, गोविन्द बाबू जतेक विधा में आ जतेक परिमाण में लिखने छथि से ककरो हेतु स्पर्धाक विषय भ सकैछ. किन्तु, ई एखनो लिखबाक सोचैत छथि. किन्तु, भगवान-भगवतीक इच्छा चर्चा नहिं करैत छथि. स्व. निरद चौधरी पंचानबे वर्षमें लिखैत रहथि तं ओ तहियाक कीर्तिमान छल.  किन्तु, जे गोविन्द बाबूकें जे जनैत छथिन, तनिका ले ई आश्चर्य नहिं. गोविन्द बाबू लिखबाक अपन अगिला योजनाक गप्प करैत कहैत छथि. ‘‘ जर्मन विद्वान लोकनि भाषाक विकासक diachronic  सिद्धान्तक प्रतिपादन केलनि. किन्तु, हुनका लोकनिक कार्य एकठाम आबि ठमकि  गेल. ओकर बाद भाषाक एककालिक  अध्ययन आरम्भ भ गेल. भाषा विज्ञानक माध्यम सं इतिहासक chronology क अध्ययन सम्भव छैक. भाषा विज्ञान में इतिहासक chronology स्थापित करबाक सामर्थ्य छैक; historical linguistics ई कय सकैत अछि.  ई भाषाक पारंपरिक अध्ययन सं सम्भव नहिं. कारण, इतिहासक अनेक श्रोत जेना, लोकगाथा, कथा, आ आन साहित्य जे बाहरी जगत केर वर्णन करैछ, ताहि में कल्पना आ असत्य सेहो मिझड भ जाइत छैक. तें, हम ‘शब्द-संधान’ लिखय  चाहैत छी. हम कहैत छियनि, अपने लिखय चाहैत छी, आ लीखि नहिं पबैत छी, तकरो उपाय छैक. अपने अपन विचार रखिऔक, तकरा voice recording सं संकलित कयल जा सकैछ. पछाति आनो एहि विषय पर काज कय सकैत छथि.’ हमरा मन पड़ैत अछि, लेखक शिवशंकर श्रीनिवास स्व.किरणजीक मुंहे कथा सुनि ओकरा लीपिबद्ध केने रहथि.
गप्प कनेक बदलैत छैक. हमर ‘कुरल मैथिली भावानुवाद'  केर चर्चाक संग हम कहैत छियनि, 'हम तमिल सिखल'. गोविन्द बाबू विषयकें आगू बढ़बैत छथि. ओ कहैत छथि, बहुतो गोटे अनुवाद करैत छथि. मुदा, ओ लोकनि भाषाक तात्कालिक अध्ययन करैत छथि, भाषाक विकासक अध्ययन नहिं करैत छथि. सुभद्र झा मैथिलीक अध्ययन कयलनि. मैथिली आ संथालीक बीच बहुतो समानता छैक. किन्तु, सुभद्र बाबूकें संथालीक ज्ञान नहिं रहनि. तें, मैथिली आ संथाली भाषाक बीचक सम्बन्ध अध्ययन नहिं भ सकल.’ गोविन्द बाबू अपन निर्देशन में सम्पूर्ण भेल मैथिली आ असमियाक तुलनात्मक अध्ययनक चर्चा करैत, लगक ताख पर सं प्रकाशित पोथीकें निकालि हमरा देखबैत छथि. कहैत छथि, 'एहि सम्पूर्ण पोथीमें phonetic notations निर्दिष्ट छैक. तमिल आ मैथिलीक बीच समानताक सेहो अध्ययन हेबाक चाही.’ हमरा ई गप्प ओ पहिनहु कहने रहथि, जहिया हुनका हम अपन ‘कुरल मैथिली भावानुवाद’ क प्रति देने रहियन.
गप्पक बीच हम तत्काल तमिल- आ मैथिलीक किछु श्रुतिसम-समानार्थक शब्दक उदाहरण दैत छियनि; यथा, माड- माल, ताय- दाई / माय, संकिली-सिकड़ी, किन्र- इनार, एच्चम-ऐंठ, नरी-नढ़िया, आदि.      
ओ कहैत छथि, ‘ ई तात्कालिक भेल. एकर chronology क संग अध्ययन हयबाक चाही. हम 1000-2000 वर्ष पुरान, तिरुवल्लुवर केर कुरलकेर तमिल शब्दाबली, आ 1855 में प्रकाशित Rev G U  Pope केर A Tamil Handbook महक तमिल- अंग्रेजी शब्दकोषकेर चर्चा करैत छी. ओहि सं ओ संतुष्ट होइत छथि आ हमरा ‘तमिल आ मैथिली’क बीचक समान शब्द सब तकबाले कहैत छथि.
अक्कू जी किछु तमिल- मैथिली शब्द सबहक बीच समानतासं चकित होइत छथि आ हमरा एहि विषय पर एकटा लेख लिखबा ले आग्रह करैत छथि. 
गप्प-सप्पक बदलैत दिशामें  संयोगसं हमर कथा “ अब्बास अली बताह छथि ?’ नामक कथाक चर्चा होइत छैक. गोविन्द बाबू कहने रहथि, ‘ हम एहन कथा आन कतहु नहिं पढ़ने छी.’  एहि विषय पर आइ ओ पुनः कहैत छथि, ‘मैथिली कथामें मिथिला सं बाहरकेर कथानक अयबाक चाही.’ अक्कू जी सेहो सहमति व्यक्त करैत छथि. हमर अपन जीवन-यात्राक दू तिहाई मिथिला सं बाहरेक अछि. तें, हमरा ले  मिथिलाक भीतर आ बाहरक अनुभवकें फुटकायब सहज नहिं. तें, हम तं हुनकर विचार सं सर्वथा सहमत छी.
हम घड़ी पर नजरि दैत छी आ गोविन्द बाबूसं हुनका सं आज्ञा लैत छी. ‘शरद् शतम्’ कें स्पर्श करैत, गोविन्द बाबू क ‘शब्द-संधान’ लिखबाक योजना सं प्रेरित होइत छी, चकित नहिं. कारण, कोन ठेकान, अगिला समयमें गोविन्द बाबू एहू सं पैघ कोनो आओर आश्चर्यनक प्रतिमान स्थापित क बैसथि ! खेल अभी आगे बांकी है, भाई !  

मैथिलीकें जियाकय कोना राखब: समस्या आ समाधान

कीर्तिनाथक आत्मालापक पटल पर 100 म  लेख   मैथिलीकें जियाकय कोना राखब: समस्या आ समाधान  कीर्तिनाथ झा वैश्वीकरण आ इन्टर...

हिन्दुस्तान का दिल देखो