प्रतिदिन भोरहिं शुरू होअय एकटा नव जिनगी, नव जीवन !

प्रतिदिन भोरहिं  ,
 (जखनि हम  उठैत छी )
शुरू होअय एकटा नव जिनगी, नव जीवन  !
विगत रातिक घूर- धुआं आ भकसी में
बिला जाय कल्हुका संताप आ संघर्ष !
अपूर मनोरथके , करी पूर उषाक लाली सँ,
मिझाबी पिपासाक आगि इजोरिआक  सिनेह सँ  !
जीवन पद्धति , नित-दिन , ( अपनाकें ) ढारय  युगधर्मक सांच में,
जबकल ,जड़-अतीत , कालक दौड़ में पछुआयल रीति-नीति,
जरओ युगक आंचमें !
तें,
जा धरि छी हम गतिमान वर्तमानक संग ,
बहैत अछि जीवनक राग ,
हमर मोन-मेरु, आ माथमें ,
ताबते छी हम जीवित !
जहिए  डेग भेल पाछू ,
आ प्रगतिक भेलहुँ हम बाधक ,
बढ़ओ सब समयक गतिक संग आगाँ ,
भले , हम पड़ल रही एसगर आ विस्मृत !
                                                                                                         
                                                                                                                पोखरा ,नेपाल .
                                                                                                                २२ मार्च २००८