अपना ओतय बेरोजगार ! कतय पाबी सरकार !

अपना ओतय बेरोजगार ? कतय पाबी सरकार !

कश्मीर में आतंकी चलौलक गोली
बिहार भरि चूल्हिमें पड़ल नहिं पजार.
बम्मै में टुटलै बान्ह,
शोकमें भरि गेल सगरो पटना मेंअखबार.
चेन्नै में ढहि गेल बनैत महल,
कतेको बिहारी दबि गेल मलबाक भीतर.
दिल्लीक अनाजमंडी मे लागल अगड़ाही,
चालीस टा भ गेल भस्म,
सबटा तं छल बिहारी !
किन्तु,
अपना ओतय अछि,
सुराज आ सुशासन.
सर्वत्र जयजयकार !
पुलकित होइत पुछलखिन सरकार:
कहू, कहू, अपनो ओतय छथि केओ बेरोजगार?
कहलखिन, संगबे कर्णधार:
कहू तं,
झूट्ठे !
सबटा फूसि प्रचार !!
अपना ओतय आ बेरोजगार ?
कतय पाबी सरकार !
अपनहिं तं थिकहुं सुशासन
आ छै तं एतय, अपनहिंक सरकार !!!