फेर आयल चुनाव
फेर आयल चुनाव,
फेर साफ हयत भूराबाल
फेर भगाओल जायत घुसैठिया ।
फेर, चुनावक समयमे
दाइ-माइकेँ भेटलनि-ए
व्यापार खोलबा लेल
टाकाक दसहजारी किश्त,
आब फेर गरिअओथिन सरकार,
'रेबड़ी' बंटनिहार बेईमानकेँ।
फेर घुरतैक
ओकरा सबहक दिन
जे स्वतंत्रताक पचहत्तरि सालक पछातिओ
टोल पर
नहि चढ़ि सकैत अछि घोड़ी पर
नहि आबि सकैछ
जूता पहिरि दलान पर।
फेर आयल चुनाव !
फेर माता जानकीकेँ
पहिराओल जेतनि माला,
आ संकल्प लेताह सरकार
शीघ्र पूर्ण करबाक हेतु
पुनौराधामक मंदिर।
मुदा, अंटकल छथिन
बाबा बिदेसर सब मुहपुरुखक कंठमे।
तेँ, भेल छथि सब केओ बौक।
मुदा, बजताह कोना?
पुछथिन कोना!
किएक नहि मैथिलीक जन्मभूमिमे
नेना नहि पढ़ि सकत मैथिलीमे।
कारण, कोन ठेकान ,
अजेय महानायक,
नबका सरकार बनलाक पछाति,
तुरते, बांटय लगलथिन
पुरुख पात्र, आ कुपात्रहुकेँ
व्यवसाय शुरू करबाक हेतु
नबका अनुदान,
वा सूद समेत बांटय लगथिन,
स्विट्जरलैंडसँ आपस आयल
काला धन केर
पंदरहलखा करार केर
कमसँ कम पहिलो किश्त!
No comments:
Post a Comment
अहाँक सम्मति चाही.Your valuable comments are welcome.