आजुक परिचित : राकेश शर्मा

आइ एकटा नव व्यक्तिसं भेंट भेल ; राकेश शर्मा . वयस दू दिन . रंग ? श्वेत, श्याम ?  उहु, रक्ताभ . दुइ दिन पहिने धरि तं माइक पेटे में छलाह . दू दिन सं भूमि पर छथि . मुदा , जनमिते लागि  गेलनि डाक्टरक फेरी . राम कहू . दुनू आँखिमें मोतियाविन्दु . मुदा, आँखि खोलि चारू भर तकैत छथि . तेज रोशनी पसिन्न नहिं . मुदा, आँखिक तं खोलैत छथि . माताक कोंढ़ फटैत छनि. मुदा की करतीह ? सोचने छलीह , राकेश चानपर जेताह . मोतियाविंदुक नाम सुनि एखन दुखी छथि . मुदा कोन ठेकान . मूक होई बाचाल ! तें , राकेश एवेरेस्ट चढ़ताह, कि चान के केर चानि पर भांगड़ा करताह के कहय ! 

                              सुनसान बाट पर एसगर हम
सुखद , सोहाओन बसात , आ सूर्यास्तकालक अरुणाभ इजोत ,
दूर-दूर धरि  पसरल परिसर,
मुदा सूनसान बाटपर अनेरे टौआइत  छी .
भोर हो वा सांझ बन्न खोभाड़ी में औनाइत अछि मन ,
भने , एसगरे बौआइत छी .
भोरे उगैत  छथि सूर्य , सांझे उगैत छथि चान
ने नानी खुअबैत छथिन चान केर कौर ,
ने बाबा देखा पबैत छथिन बाउ कें भोरुका किरन .
की करताह चान -सुरुज ?
उगैत छथि , डूबैत छथि , डूबैत छथि, उगैत छथि !
की करत कौआ आ मेना ?
ने बौआ तकैत छथिन बाट ,
ने बौआसीन करैत छथिन खोज .
मुदा, हमरा चाही सबटा .
चान-सुरुज , कौआ-मेना
 मनुक्ख आ जानवर, 
वायु आ बसात ,
सांझुक घूड़-धुआं
भोरुका ओस आ कुहेस
दिनुका रौद आ रतुका तरेगन .
धानक खेत आ आमक  गाछी
मुदा, सबटा कोना भेटत ? बैसल अपन कोठलीक अभयारण्य में !
तें,
हम, सूनसान, निःशब्द  बाटपर अनेरे टौआइत  छी .
 बन्न खोभाड़ी में औनाइत अछि मन ,
तें,भने , एसगरे बौआइत छी .
कदाचित् , एहि सांझमें , वा कल्हुका भोर में,
 होई ,
कतहु कोनो मनुक्खक आहट, वा नेनाक  स्वरक सनेस
आ हठात ,
निःशब्दताक होई दमन ,
आ मनुक्खक  होइ प्रवेश .

जे किछु फुरल

1

वृद्ध केर ह्रदय होइछ नेने जकां 

नेनोक मोन होइछ बूढ़ 

बुझबा ले मनुक्खक ह्रदय चाही 

से बुझथि  नहिं  मूढ़ 

2

कडलूर क साँझ , पांडिचेरी क सूर्योदय 

अवाम केर घास परहक ओस 

लद्दाख क रौदक दुलार 

उत्तरांचलक फुलबारी क सिंगार

मोन में जगबइ अछि एके भाव; 

जं सबतरि  के बूझी अप्पन, 

तं कथुक नहिं अभाव !

3

दृष्टिक सीमाक पार 

दूर दूर धरि पसरल

 चंचल सागरक  पसार 

दूर दूर धरि समयक असीम पसार में 

बौआईत मोन 

एकहि संग देखबैत अछि 

स्मरण नन्दन काननक 

आ नरकक दारुण दृश्य 

जेना 

नागफनीक जंगल सं  छनि कय अबैत सूर्योदय क स्वर्णिम किरण 

थिक जीवनक सत्यक प्रतिरूप

चुनाव २०१४

चुनाव देखैत 42 वर्ष भ गेल .बहुत किछु बदलल . बहुत किछु नहिं बदलल. बदलल माने , लोक बदलि गेल. समय बदलि गेल . समाज बदलि गेल . प्रचारक तरीका बदलि गेल. नहिं बदलल, त बैमानी नहिं बदलल . छल स जितबाक प्रपंच नहिं बदलल . प्रलोभन देबाक चालि नहिं बदलल . लोक के ठकबाक बानि नहिं बदलल .
हमरा लोकनिक सांसद चुनाव में सफल होइत छथि . दिल्ली जाइ छथि आ  घूरि क पांच बरखक पछातिये , पुनः चुनाव में निर्लज्ज जकां ,भोट मंगबा लेल अबै छथि . वैह खुरपेरिया बाट  , वैह खाधि - खोड़ा . मोटर के धक्का लगा कय गौआ सब खाधि पार कय  दइ  छनि . टाका क बलें  चुनाव जिता दैत छनि . आ फेर हमर प्रतिनिधि पांच सालक दिल्लीबास पर बिदा भ जाइत  छथि . मुदा , देखी २०१४ केर चुनाव कोन गुल खिलबैत अछि !

कने सोचियउ त 

1 

बगडा भ गेल निपत्ता,

मुदा गिद्ध भ गेल संरक्षित  !

माने, चाही , अफरात चरी ,

चारूभर सुरक्षा चक्र,

आ भयमुक्त विचरण !

तें तं ,सुरक्षा चक्र में गिद्ध निस्संक लगा रहल छथि  बगडा क भोग !

आ असहाय चिडइ -चुनमुनी मना  रहल अछि मनहि -मन  शोक !!

2

एकटा कोठली तीन टा  लोक ,

बाजा-ने-भुकी , मेल-ने-जोल 

पड़ोसियाक घर में लागल छै आगि ,

मचल छै अनघोल ,

धत्तोरिके ! बुझलियइ कहाँ ,

हमरा सबहक कान में लागल छल फोन !

3 

बाबा, केहन होई छै , बम्मई आम ?

बड होइए सेहन्ता, कने बुझितियइ स्वाद  !

की करू बाउ, कोना बुझाऊ , अद्भुत अछि सवाल  ,

मुदा, पुछियनु पितामह गूगुल के ,

कदाचित् , हुनका लग होइन कोनो बराबरीक स्वाद  !

 

समैया बसात

1 

अपने बोली,अपने भाखा, लगैए अजगुत 

अपने स्वर लगैए अनचिन्हार 

गामक  सुनल पुरान  गीत लगैए नव 

अपने पुरान  बानि लगैए अनसोहांत । 

2 

चिन्हल रिआय लगैए दडकल 

चिन्हले लोकक व्यवहार देखै छी बदलल 

घोदामाली भेल परिजन सुतै छल निस्संक  निर्विकार

आब, ख़ुशफैल शान्त आवास में, लोक बरमहल अछि  अनिद्राक शिकार ।

3 

नीक लोकक आन करितै प्रशंसा 

अनटोटल व्यवहारक होइतै उपहास 

स्वेच्छा स लोक चुनैत मुखिया 

प्रचारक कोन  दरकार

4 

एखनि विपटा बनल अछि विशिष्ट 

सबतरि उधियाइए  प्रचार 

मुंह कोनो  खतियान छै !

 ठकि   आउ संसार  ! !

ऋतु परिवर्तन

1

ऋतु परिवर्तन अनैत अछि नव आशा 

ऋतु परिवर्तन कखनो लबैत अछि अगबे निराशा

मुदा , आशा आ निराशा थिक मनक उपज 

आ परिवर्तन थिक मनुक्खक दास 

तें , हे मन ! किएक होइत छह उदास ?

2 

मनुक्खेक मोन थिक नीक बेजायक निकती- तराजू 

आ सत्य-असत्य , नीक-बेजायक पैमाना थिक काल 

मुदा, जीवनक परिधि अछि छोट 

तें मनुक्ख होइत अछि निराश 

मुदा लगाउ त सब मिलि एकबेर जोर

आ करी  पैमाना बदलबाक प्रयास ?

3

हवा में छै परिवर्तनक शुभ संकेत 

वायु कोन में देखैत छियैक बिहाडिक आभास

आह ! अबउ त  एकबेर कसगर झोंकी आ खसा दौ जर्जर दलान

तखने त उठतै नव घर आ नवतुरिया चलाओत  अभियान 

आ फेर बदलल ऋतु में

अओतैक क्लान्त- परिश्रान्त मनुक्ख में जान !